करिश्मा मानन्धर, नायिका

KArishma Manandhar - Nepali Actress

मलाई धेरैले राम्री भन्छन्। हामी सो पीस भएकाले राम्रो भएर हिँड्नु, शरीरलाई मेन्टेन गर्नु बाध्यता पनि हो। यसका लागि म विशेष ध्यान त दिन्न, तर केही सजग भने अवश्य नै हुन्छु। जस्तो मलाई के थाहा छ भने उमेर बढ्दै जाँदा मान्छे मोटाउन थाल्छ, त्यसलाई रोक्न भोगटेको रस पिउँनुपर्छ। खाने बित्तिकै सुत्नु हुँदैन भन्ने ज्ञान भएकाले म खाना खाएर केहीबेर टहलिन्छु वा केही काममा व्यस्त हुन्छु। राति सकेसम्म हेभी खाना खान्न। अनुहारलाई ताजा राख्न शुद्ध तोरीको तेलमा दूध मिसाएर अनुहारको मसाज गर्छु। बिहानै मह र कागती मिसाएर करिब आधा लिटर पानी पिउँछु। दैनिक दुई गिलास दूध पिउँछु, राति र दिउँसो। सुत्नेबेलामा दूध पिउँनु राम्रो हो भन्ने कुरा एक चिकित्सकले बताएपछि म त्यसलाई दैनिक फलोअप गरिरहेको छु।

अल्कोहलका विषयमा पनि मेरो आफ्नै धारणा छ।  मादकपदार्थ यस्तो वस्तु हो, जसलाई तपाईं कुन फिलिङ्समा पिउनु हुन्छ, त्यसको असर त्यही हुन्छ। मानौं तपाईं दुःखी हुनुहुन्छ, दुःख भुलाउन त्यसलाई पिउनु हुन्छ। त्यो अल्कोहल रगतमा मिसिएर बिहानसम्म तपाईंलाई दुःखी नै बनाइरहेको हुन्छ। अब त्यही अल्कोहललाई तपाईं साथीभाइसँग खुसी बाँड्न लिनुहोस्, बिहान तपाईंको मुड फ्रेस नै हुन्छ। अर्को कुरा मादकपदार्थ तपाईंको कमजोरी हो कि कहिलेकाहीँ रमाइलो गर्ने माध्यम हो त्यसले पनि फरक पार्छ।

अल्कोहल पिउँदा एक पेग सिध्याउन आधा घण्टा लगाउनुपर्छ। त्यसलाई दुई मिनेटमा घुट्क्याउनु हुन्छ भने त्यो तपाईंको दोष हो, अल्कोहलको होइन। तपाईं ३ पेग पिउनुहुन्छ भने त्यसलाई कम्तीमा पनि दुई घन्टा लगाउनुपर्छ। हाम्रो शरीर भनेको पीठो पिस्ने मेसिन जस्तै हो। मेसिनको सोलीमा त्यति मात्र हाल्नुपर्छ, जुन त्ससले पिस्न सक्छ। एकैपटक धेरै गहुँ हाल्नुहोस्, मेसिनले राम्रो पीठो निकाल्न सक्दैन। मानिसहरू फलफूल खाँदा मोटाइँदैन भन्ने धारणा राख्छन्। फलफूलमा कार्बोहाड्रेडको मात्रा प्रसस्त हुन्छ। मेरो विचारमा फलफूल दैनिक खानुपर्छ, तर त्यो दुई चार पिसभन्दा बढी हुनुहुँदैन।