नेपाली नायिकाको सौन्दर्य परीक्षण

'चन्द्रमाको किरणजस्तो रूप, कमलतुल्य आँखा भएकी अर्थात् कमलनयनी, छमछम आवाज दिने बाला र पाउजुको गहना लगाएकी, पुष्ट स्तनको भारले केही निहुरिएकी युवती ज्यादै आकर्षक हुन्छन्।' उज्जैनका राजा भर्तृहरिले आफ्नो प्रसिद्ध पुस्तक 'नीति शतक' को 'श्रृंगार शतक' मा महिलाको सौन्दर्यलाई यसरी नै परिभाषित गरेका थिए। नेपाली चलचित्रका अधिकांश नायिकाको मेकअप गरिसकेकी मेकअप आर्टिस्ट नन्दा अधिकारीको सौन्दर्य परिभाषा भने केही पृथक छ। उनी भन्छिन्— 'जसको अनुहारको छाला प्राकृतिक रूपमा कोमल तथा मुलायम छ, उनैलाई राम्री भन्न सकिन्छ।'

साप्ताहिकले केही साताअघि सम्पन्न गरेको ग्लाम हन्ट प्रतियोगिताका अधिकांश प्रतिस्पर्धीको फोटोसेसनका क्रममा उनीहरूलाई सिंगार्ने जिम्मेवारी बहन गरेकी नन्दा अधिकारीले नायिका, मोडल तथा गायिका गरी करिब एक सयभन्दा बढी सेलिब्रेटीलाई सिंगारिसकेकी छिन्। लामो समयदेखि मेकअप आर्टिस्टका रूपमा कार्यरत नन्दाले विज्ञापन -पेपर, टिभिसी), म्युजिक भिडियो, चलचित्र आदि विधाका लागि नायिका तथा मोडलहरूको मेकअप गरेकी छिन्। पुरानी नायिका करिश्मा मानन्धरको सौन्दर्य तथा छालाको गुणस्तरबाट अत्यन्त प्रभावित नन्दाले करिश्मालाई विभिन्न औपचारिक तथा अनौपचारिक समारोहमा भेटिसकेकी छिन् तर आजसम्म मेकअप गर्ने अवसर भने पाएकी छैनन्। यसबीच निरुता सिंहदेखि नयाँ नायिका सुष्मा अधिकारीसम्मको मेकअप गरिसकेकी नन्दाले साप्ताहिकका लागि केही नाम चलेका नायिका तथा मोडलहरूको सौन्दर्यको विश्लेषण गरिन्।

रिडीकोट, अछाममा जन्मिएर परिवारका सदस्यहरूसँगै बाल्यकाल तथा युवावस्था भारतको मुम्बईमा बिताएकी नन्दाले मुम्बईमै ब्युटिपार्लरसम्बन्धी ज्ञान हासिल गरेकी थिइन्। नेपाल आएपछि उनले वरिष्ठ मेकअप आर्टिस्ट सन्तु तामाङसँग मेकअपको औपचारिक प्रशिक्षण लिइन्। मनोरञ्जनका प्रायः सबै विधामा सक्रिय हुने नायिका तथा मोडलहरूको मेकअप गर्ने क्रममा नन्दाले कुन नायिकाको छाला कस्तो छ, कुन नायिकालाई कस्तो मेकअप सुहाउँछ, कुन नायिकाले आफ्नो सौन्दर्यलाई विशेष ध्यान दिनुपर्छ भन्ने कुराको अध्ययनसमेत गर्न भ्याएकी छिन्।

फेसन शो, स्टेज कार्यक्रम, फोटोसेसनलगायत केही ब्युटी पेजेन्टका प्रतिस्पर्धीहरूको समेत मेकअप गरिसकेकी नन्दाले नायिकाहरूतर्फ निरुता सिंह, नीता ढुंगाना, केकी अधिकारी, सुष्मा कार्की, सुष्मा अधिकारी, पि्रयंका कार्की, दिया मास्के, निशा अधिकारी, नन्दिता केसी, उषा पौडेल, रिमा विश्वकर्मा, जिया केसी, सौजन्य सुब्बा, शिल्पा पोखरेल, अशिष्मा नकर्मी आदि नायिकाको मेकअप गरिसकेकी छिन्। त्यसबाहेक उनले मोडलहरू सुरबिना कार्की, फोबी रिमाल, लक्ष्मी थापा, चाहना लामा, प्रतिमा गिरी, श्रीयानी संग्रौला, स्यारोन श्रेष्ठ, रेखा पुरीको समेत मेकअप गरिसकेकी छिन्। गायिकाहरू इन्दिरा जोशी, मल्लिका कार्की, माण्डबी त्रिपाठी, आस्था बी, जुनु रिजाल, निशा सुनार, कृष्णा बीसी, गायत्री थापा, शिला भण्डारीको छालालाई पनि नन्दाले सिंगारी सकेकी छिन्। महिला सेलिब्रेटीहरू मात्र होइन, नन्दाले केही पुरुष सेलिब्रेटीको समेत मेकओभर गरेकी छिन्। नन्दाले नायक जीवन लुइँटेल, राजबल्लभ कोइराला, विमलेश अधिकारी, कलाकार सुनील थापा, गायकद्वय सत्यराज-स्वरूपराज आचार्य, शिव परियार, रूपक डोटेल, कोरियोग्राफर शंकर बीसी, मोडल आकाश घर्तीमगर आदिको मेकओभर गरेकी छिन्।

मेकअप आर्टिस्टका रूपमा आधा दशकभन्दा बढी समयदेखि नेपालको मनोरञ्जन क्षेत्रमा सक्रिय नन्दा अधिकारीले नेपाली नायिकाहरूको छाला औसतभन्दा राम्रो भएको मूल्यांकन गरेकी छिन्। 'धेरैजसो नायिकाको छालाको रंग गहुँगोरो छ, नन्दा भन्छिन्— 'सामान्य हेरचाह गर्दा नै उनीहरूको छाला आकर्षक हुन्छ तर कतिपय नायिका छालाको हेरचाहमा ध्यान नदिँदा सोचेजस्तो आकर्षक देखिन सकेका छैनन्।'

साप्ताहिकको आग्रहमा नन्दाले करिब एक दर्जन नेपाली महिला सेलिब्रेटीको छाला तथा साैन्दर्यको मूल्यांकन गरेकी छिन्। नन्दाको मूल्यांकन उनकै शब्दमा ।

करिश्मा मानन्धर

नेपाली नायिकाहरूमध्ये करिश्मा मानन्धरको छालाको गुणस्तर उत्कृष्ट छ। मैले आजसम्म उनको मेकअप गर्ने अवसर त पाएकी छैन तर विभिन्न सभा-समारोहमा मैले उनको छाला र सौन्दर्यलाई नजिकबाट नियाल्ने अवसर पाएकी छु। उनको छाला प्राकृतिक रूपमै नरम छ। अनुहारको छाला प्राकृतिक भएकाले हल्का मेकअपमै उनलाई सुन्दर देखाउन सकिन्छ। अनुहारको बनावट नै आकर्षक भएकाले हेभी मेकअपको आवश्यकता पर्दैन।

निरुता सिंह

पछिल्लो समय चलचित्रमा त्यति सक्रिय नभए पनि नायिका निरुता सिंह सुन्दर नायिकाहरूमध्ये एक हुन्। निरुताको छाला गोरो र नरम छ। मैले निरुताको धेरैपटक मेकओभर गरेकी छु। अन्य नायिकाहरूको तुलनामा उनको अनुहारमा मेकअप गर्न सजिलो लाग्छ। प्राकृतिक रूपमै गोरो छाला भएकाले धेरै मेहनत गरिरहनु पर्दैन। उनको छाला नरम र मुलायम छ। नियमित योग गर्ने भएकाले पनि निरुताको छाला चम्किलो र नरम भएको हो।

नीता ढुंगाना

नेपाली चलचित्रका नयाँ नायिकाहरूमध्ये नीता ढुंगानाको छाला सबैभन्दा आकर्षक छ। एउटा दुर्घटनाका कारण गालामा हल्का दाग बसे पनि उनको अनुहारको छाला नरम छ। चलचित्र अथवा म्युजिक भिडियोको छायांकनअघि उनको मेकओभर गर्दा दाग नदेखियोस् भन्ने कुरामा विशेष ध्यान दिनुपर्छ। प्राकृतिक रूपमै गोरो छाला भएकाले नीतालाई लाइट मेकअप सुहाउँछ। छालालाई दीर्घायु बनाउन उनले त्यसको विशेष हेरचाह गर्नु आवश्यक छ।

केकी अधिकारी

पछिल्लो पुस्ताकी लोकपि्रय नायिका केकी अधिकारीको मैले थुप्रै म्युजिक भिडियोका लागि मेकओभर गरेकी छु। केकीको अनुहारको छालाको क्वालिटी 'रफ' छ। उनको छालाको रंग गहुँगोरो छ। आउटडोर छायांकनमा व्यस्त भएकाले होला केकीको अनुहारको छाला डढेजस्तो देखिन्छ। त्यसैले मेकअप आर्टिस्टले उनको मेकओभर गर्दा अलि बढी नै मेहनत गर्नुपर्छ। केकीलाई हेभी मेकअप सुहाउँछ। हेभी मेकअपपछि केकीको लुक्स असाध्यै आकर्षक देखिन्छ। केकीलाई म व्यक्तिगत रूपमा के भन्न चाहन्छु भने उनले घरबाहिर घाममा निस्कँदा सधैं सनस्किन क्रिम लगाउनुपर्छ। प्रसस्त पानी पिउनुपर्छ। खानपिनमा फलफूलको मात्रा बढाउनुपर्छ। यति गरेको खण्डमा केकीको रफ छालाले चाँडै नै नरम छालाको रूप लिनेछ।

सुष्मा कार्की

सुष्मा कार्कीको छाला प्राकृतिक रूपमै नरम छ। गोरो छाला भए पनि उनलाई लाइटभन्दा हेभी मेकअप बढी सुहाउँछ। छाला नरम भएकाले उनको मेकअप गर्न पनि सजिलो हुन्छ। सुष्माले आफ्नो छालाको सौन्दर्य कायम गर्न भने धेरै कुरामा ध्यान दिनुपर्छ। खासगरी सुष्माले खानपिनमा पर्याप्त ध्यान दिनु आवश्यक छ। चिल्लो र पीरो भनेपछि हुरुक्क हुने सुष्माले खानपिनमा यी दुई कुरा कटौती गरिन् भने उनको छालाको सौन्दर्य अझ बढ्ने निश्चित छ।

पि्रयंका कार्की

पछिल्लो समयकी व्यस्त नायिका पि्रयंका कार्की गहुँगोरो वर्णकी छिन्। गहुँगोरो भए पनि उनको छाला नरम छ। मेकअप गर्न सजिलो हुने छाला छ। लाइट मेकअपमै उनलाई राम्री देखाउन सकिन्छ। उनले छालाको सौन्दर्यलाई अझ बढाउन खानपिनमा विशेष ध्यान दिनुपर्छ। खानेबानीमा परिवर्तन ल्याउन सके पि्रयंकालाई पर्दामा अझ राम्री देखाउन सकिन्छ।

दिया मास्के

दिया मास्के पनि गहुँगोरो वर्णकी छिन्। उनको छाला नरम भएकाले मेकअप गर्दा खासै समस्या आउँदैन। उनलाई लाइट मेकअप सुहाउँछ। छालालाई अझ नरम बनाउन दियाले खानपिनमा केही बढी ध्यान दिनुपर्छ।

निशा अधिकारी

निशा अधिकारीको छाला असाध्यै राम्रो छ। गोरो वर्ण भएकाले पनि उनको मेकओभर गर्दा कम परिश्रम गरे पुग्छ। उनलाई लाइट मेकअप सुहाउँछ। खानपिनमा सामान्य मेहनत गर्दै पानीको मात्रा बढाए निशाको छाला भविष्यसम्म पनि कोमल रहनेछ।

सुष्मा अधिकारी

पछिल्लो समयकी नायिका सुष्मा अधिकारीको छाला रफ छ। अनुहारमा डन्डिफोर आएकाले पनि उनको छाला रफ देखिएको हो। यसबाहेक उनको छाला हल्का डढेजस्तो पनि देखिन्छ। उनको छालाले हेभी मेकअप माग्छ। गहुँगोरो वर्णकी सुष्माले छालाको सौन्दर्य बढाउन घामबाट जोगिनु अत्यावश्यक छ। यसबाहेक बाहिर निस्कँदा सनस्किनको प्रयोग अनिवार्य रूपले गर्नुपर्छ। खानपिनमा ध्यान दिन सके सुष्माको छालाको सौन्दर्य बढ्छ।

नन्दिता केसी

गहुँ गोरो भए पनि नन्दिताको छाला नरम छ। उनलाई लाइट मेकअप सुहाउँछ। मेकओभर गर्दा उनको छालामा धेरै मेहनत गरिरहनु पर्दैन। खानपिनमा केही बढी ध्यान दिन सके नन्दिताको छाला धेरै वर्षसम्म एकसमान रहनेछ।

रिमा विश्वकर्मा

रिमाको छाला गोरो र नरम छ। उनलाई लाइट मेकअप सुहाउँछ। यति हुँदाहुँदै पनि रीमाले आफ्नो अनुहारको छालामा विशेष ध्यान दिनु अनिवार्य छ। जस्तै घाममा सनस्किनको प्रयोग, पानी र फलफूलको अत्यधिक सेवन आदि।

जिया केसी

जियाको छाला पनि गोरो र मुलायम छ। उनलाई लाइट मेकअप सुहाउँछ र मेकअप गर्दा खासै परिश्रम पनि गर्नुपर्दैन। अमिलो र पिरो बढी मन पराउने भएकाले जियाले समयमै यी दुई कुरा रोक्नु आवश्यक छ अन्यथा उनको छालामा समस्या आउन सक्छ।

सौजन्य सुब्बा

सौजन्यको छाला रफ छ। उनका लागि हेभी मेकअप गर्नुपर्छ। घाममा हिँड्दा विचार नपुर्‍याएकाले उनको छाला रफ भएको हो। सकेसम्म घामबाट बच्ने प्रयास गर्नुपर्छ। सनस्किनको प्रयोगले छालालाई घामबाट बचाउन सकिन्छ। सौजन्यले पनि खानपिनमा ध्यान दिनु आवश्यक छ।

उषा पौडेल

उषा काठमाडौंमा हुन्जेल गोरो वर्णकी थिइन् तर लामो समयदेखि मुम्बईमा भएकाले उनी अहिले गहुँ गोरी भएकी छिन्। उनलाई लाइट मेकअप सुहाउँछ। छाला सफ्ट भएकाले हेभी मेकअप गरिरहनु पर्दैन। अमिलो र पीरोकी सौखिन उषाले खानपिनमा ध्यान दिइन् भने छाला दीर्घायु हुने निश्चित छ।

मेकअप आर्टिष्ट नन्दा अधिकारीका अनुसार नायिका मल्लिका कार्कीलाई हेभी मेकअपको आवश्यकता पर्छ भने गायिका आस्था बीको छाला प्राकृतिक रूपमै कोमल भएकाले लाइट मेकअप सुहाउँछ। इन्दिरा जोशीलाई पनि लाइट मेकअपमै सुन्दर देखाउन सकिन्छ। निशा सुनार गहुँगोरी छिन् त्यसैले उनका लागि हेभी मेकअप आवश्यक छ। गायिका रेश्मा सुनुवारलाई पनि हेभी मेकअप सुहाउने नन्दाको निष्कर्ष छ।

हालै बलिउडमा प्रदर्शन भएको चलचित्र 'सत्याग्रह' का मेकअप आर्टिस्ट विक्रम केसी नन्दा अधिकारीका काका हुन्। विक्रमले थुप्रै हिन्दी धारावाहिकमा मेकअप आर्टिस्टका रूपमा काम गरिसकेका छन्। बलिउडमा मेकअप आर्टिस्टका रूपमा स्थापित भैसकेका काकाकी भतिजी नन्दालाई अहिले बलिउडबाटै प्रशिक्षणसहित काम गर्ने प्रस्ताव पनि आइरहेका छन्। 'नेपाली मनोरञ्जन क्षेत्रमै व्यस्त हुने कि मुम्बई जाने निर्णय गर्न सकिरहेकी छैन। एक दर्जन चलचित्र, तीन दर्जन म्युजिक भिडियो तथा केही दर्जन विज्ञापनमा मेकअप आर्टिस्टका रूपमा काम गरिसकेकी नन्दा नेपालमै पनि मेकअप आर्टिस्टको भविष्य उज्ज्वल रहेको  धारणा व्यक्त गर्छिन्।